負油價set up了誰
我們之前貼了”負油價時代來臨”的貼文，馬上就出現歷史性的負油價。
為甚麼會出現負油價呢，買油還有錢收?
堅sir用Liquidity就可以輕易解釋件事。期油是商品期貨，到結算日要實物交收，有要倉和運輸等去交/接貨。絕大部份期油倉位都不會到實物交收的。實物交收有高昂成本，很多證券商都不會容許客戶做實物交收。到結算前五月期油價格一路壓住一路走低，做了期油好倉的，就侷住掟返晒出來(沽返期油平倉)。其實好倉都等了好耐，一直都無個”似樣D”的位平倉。全世界都見到都知你要掟返出來，當然唔會同你接啦。結果一直隊落去隊到負數，如入無人之境(中途基本上完全無bid)，行刑式斬倉咁斬到近負40。留意六月期油當時一直企係正20元樓上。
3175轉倉單野大家才知道ETF渣近月期油合約，係會被人set up的。呢類ETF, 例如USO, UCO等都唔會月底結算前先轉倉。但係咁大AUM(管理資產規模)，轉倉等操作規則清楚，一有機會，就睇住你來打，當然就容易被人set up啦。上次XIV被人set到爆倉，堅sir都有以liquidity和AUM來分析過。市場上有一些ETF不只是持近月的，可以參考下例如USL持多月期油合約。
即月壓到低一低，侷住要轉倉，就輸跨價都輸死。六月期油已經開始玩野。呢排儲油設備爆晒，疫情下需求低迷。會唔會又炒到負數，大家睇實!
注意美國交易所沒多久前才研究期貨到負值下的margin和option的影響。五月期油炒到負數，開展了金融市場的新世界。原來係可以炒到負數，PUT IV都立刻大升，0.5P價值高過0.5。教科書都要改寫!
講返大圍D。市場一直傳，OPEC談判失敗，油價大跌係沙特和俄佬合力set up美帝的。讓美國頁岩油(shale oil)企業全部破產。自從美國頁岩油大量開採後，國際能量市場的格局變天。舊勢力想佢死好耐。聯手挾唔到個油上去，不如試下玩低油價。金融市場的出現和廣泛應用，以前都是先進國家set up發展中國家的。但是金融市場已經運行多年，大家都開始識玩個遊戲，而且今時今日，只要科水，智囊食客排隊於門外。油王都可以同你講option gamma，投資者若仲唔進修就真係自求多福也。
油王只要在高位大量做倉，油價大跌全球金融市場幫手埋單。SHORT PUT者仲要繼續高價接貨。所以計沙特俄佬頂到幾多個月，有無計埋呢條數? 留意原油期權的到期日和期貨不同。是美式期權，隨時可以行使俾油你，問你怕未? 怕怕就唯有係期油市場沽返期貨出去，一齊幫手推低個價，來一次完美零下風暴。
